Gikatakdang ipahigayon ang Switching-On of Christmas Lights sa atong Syudad sa Cabadbaran ugmang adlawa, Hwebes, Disyembre 9, 2021, alas-7 sa gabii via Facebook Live, kon diin walay aktwal nga programang abli sa publiko nga ipahigayon aron malikayan ang pagdugok sa bagang duot sa katawhan nga maoy kasagari nahitabo matag tuig kaniadtong mga panahon nga wala pa ang pandemya.

Aduna usab kitay mga lugar na pwede ninyong masuroyan sama sa mga mosunod:

– Inter-Barangay Parol Competition nga nakalatag sa atong National Highway.

– Public Transport Terminal and Market

– City Hall Grounds and inside the Peoples Government Center.

Ang atong pasundayag sa Rizal Park modagan hangtud sa bulan sa Pebrero, 2022 atol sa kapistahan sa atong Syudad busa dili gikinahanglan nga makigdasok kita sa kadaghanan hilabi na niining panahon nga aktibo pa ang pagkuyanap sa COVID-19.

Ang plaza sa tibuok bulan sa Disyembre, abli sa publiko sugod alas-6 hangtud alas-10 sa gabii apan mas hatagan sa prayoridad ang mga bata nga nagpangedaron og 10 anyos paubos. Matag bata nga makasulod gitugutan lamang ug usa ka kauban mapaginikanan o kapamilya. Kon ugaling daghan bata unya usa lang ang chaperone pwede ra.

Hinumduman nato nga matag sayong gabii sa adlaw nga Biyernes ug Sabado sa tibuok bulan sa Disyembre, adunay ipahigayon nga Disney Children Show nga eksklusibo alang lamang sa mga barangay sumala sa nakaiskedyul. Human sa maong eksklusibong pasundayag, ablihan na usab sa publiko ang Rizal Park para sa gusto mosuroy.

Aduna kitay mga protocols nga ipatuman sa pagsulod-paggawas apil ang limitadong pagsuroy sa mga tawo busa gihangyo ang tanan nga motuman sa mando sa mga awtoridad sama sa mga pulis, CDRRMO, AFP, ug Barangay CVOs.

Balikon namo aduna kitay taas nga panahon nga masaksihan ang mga adorno sa Pasko sa may Rizal Park busa dili kinahanglan makigdasok.

Gihangyo ang inyong kinasingkasing nga pagsabot ug kooperasyon tungod sa nagpadayon nga pagkanat sa Covid19 karong panahuna.

Let us be responsible and safe in our celebration of Christmas most especially in this time of pandemic.

D A G H A N G S A L A M A T!