Nanguna si City Mayor Judy C. Amante sa pag panghatag sa Shelter Assistance nga gikan sa panudlanan sa Probinsya sa Agusan del Norte nga mokabat sa P4,790,000.00 ilawom sa hiniusang paningkamot ni Cong. Maria Angelica Rosedel Amante Matba ug Governor Dale B. Corvera ngadto sa mga pamilya nga totally damaged gyud ang ilang panimalay gumikan sa paghapak sa bagyong Odette niadtong Disyembre 15, 2021.
Mokabat sa P10,000 ang nadawat nga Shelter Assistance sa matag pamilyang ang mga panimalay naguba diin ang P3,000 gitunol mismo ang cash ug P7,000 nga balor sa mga materyales para makatukod balik ug bag-ong panimalay.
Ang nakadawat karong adlawa mao ang mga apektado sa Poblacion 1, 2, 3, 6, 7, 8, 9,12 lakip na ang mga apektado sa Barangay Bay ang, Comagascas, Del Pilar ug Kauswagan.
Malaumon si Mayor Amante nga madapat gyud sa insakto ang gitunol nga hinabang sa probinsya. Padayon ang paningkamot sa lokal nga panggamhanan nga madugangan pa ang maong ayuda aron sa hinanaling pagpatindog balik sa mga nahugmak nga panimalay uban sa tinguha mahatagan ug luwas nga luna alang sa bag-ong housing area.