Pormal na nga gi-turn-over kagahapon sa hapon, Abril 13, 2023 ngadto sa mga benepisyaryong kanhi mga rebelde kon FRs nga nibalik na sa sabakan sa balaud ang ilang tagsa-tagsa ka mga panimalay nga nahimutang sa Barangay Del Pilar, Cabadbaran City.
Ang maong programa gipasiugdahan kini sa Agusan del Norte Provincial Government sa pagpanguna ni Governor Maria Angelica Rosedell M. Amante, pinaagi sa National Housing Authority (NHA) ug suportado usab kini sa Cabadbaran City Government ug pipila ka mga pribadong indibidwal aron matuman kini nga proyekto alang sa mga rebel returnees sa probinsya.
Si City Councilor Val Villanueva ang mitambong sa maong programa sa ngalan sa LGU Cabadbaran, uban usab sila si Agusan del Norte 2nd District Congressman Dale B. Corvera, Vice Governor Enrico R. Corvera ug mga kadagkuang opisyal sa militar.
Ang maong panimalay aduna sukod nga 80 square meters nga yuta ug 36 square meters nga floor area nga gilangkuban sa duha ka kwarto, kusina, dining area, kasilyas, banyo, ug garahianan diin mokantidad sa tag P450,000.00 matag unit.