Gipangunahan ni City Mayor Judy Chin Amante ang gipahigayon nga benchmarking activity uban ang mga department heads sa syudad ngadto na sa Munisipyo sa Kitcharao, Agusan del Norte, aron personal nga mabisita ang LGU Demo Farm niini. Mainiton nga gi-welcome ni Municipal Vice Mayor Aristotle Montante ug Municipal Agriculturist, Dr. Raul M. del Agua ang grupo ug gisuroy kini libot sa ilang gipasigarbong pasilidad.
Ang maong area gilangkuban sa tulo (3) ka ektaryang yuta nga napalit lamang sa lungsod sa mas barato nga presyo sa tuig 2004, ug nasugdan kini sa pag-develop sa tuig 2016 aron himoon nga Kitcharao LGU Farm ug Tourism Facility nga gilangkuban sa mga mosunod:
*Municipal Agricultural Manpower Development and Training Center
*Municipal Agriculture Office
*Municipal Agriculture Learning Center
*Farm School
Sumala pa ni Vice Mayor Montante nga namugna kini nga proyekto pinaagi sa inisyatiba sa lokal nga panggamhanan isip tubag sa mga nag-unang problema sa ilang mga mag-uuma, kon diin mao kini ang nag-unang panginabuhian sa mga katawhan sa ilang lungsod. Gidugang pa ni Vice Mayor Montante nga mokabat na sa kapin 30 milyones ka pesos ang nabubo na sa maong proyekto kon diin kaugalingon lamang kini nga pondo sa ilang munisipyo.
Makita usab sulod sa ilang pasilidad ang Single A nga Slaughter House, fish pond ug gulayan nga pwedeng “pick and pay” sa mga bisita, humayan, manukan, ug mga binuhing kanding ug uban pang kahayupan. Kon managhan na ang production niini, ila na pod kining ipanghatag sa mga mag-uuma aron makasugod sa pagpamuhi og hayop.
Gikan sa LGU Farm, human sa pagpaniudto gidala usab ni Vice Mayor Montante ang grupo sa laing proyekto sa LGU nga mao ang Lantawan Eco-Park Lakeshore area, kon diin gisugdan na pag-develop ang maong lugar sama sa paghimo ug mga modernong cottages aron mamahimo na usab kini nga nindot nga tourist destination sa ilang munisipyo.
Mapasalamaton si Vice Mayor Montante nga napili ang ilang lungsod nga bisitahan sa mga department heads sa LGU Cabadbaran sa pagpanguna ni Mayor Amante, aron mamahimo kining sumbanan sa pagahimoon usab nga susamang proyekto sa Syudad sa Cabadbaran.
Sa pikas bahin gibutyag usab ni Mayor Amante nga daku ang iyang kalipay nga personal nga nakabisita sa maong lungsod ug daghan kini nakutlo nga mga positibong pagtulon-an aron mamahimo kining kabahin sa pagtoon alang sa planong pagtukod usab ug Eco Tourism Facility sa syudad. Gidugang pa ni Mayor Amante nga aduna nay napalet nga duha (2) ka hektaryang yuta ang syudad nga nahimutang sa Barangay Sanghan nga planong tukuran sa susamang pasilidad. Daku usab ang pagpasalamat ni Mayor Amante sa LGU Kitcharao sa maiinitong pag-abi-abi sa grupo, ug gipasalig niini nga andam siya nga mo promote sa maong lungsod sa ilang mga maanindot nga talan-awon labi na ang LGU Farm ug Lantawan Eco Tourism Park.